Hikayat Amang Ikak

MINTAK THR

Jaman tengah pael, ekonomi murat maret
Timah murah, apa agik harge karet
Kepala bise ngesat duit tambeh sulet
Ngadep ari raya, utek bise kepala kelempet

Bacaan Lainnya

Wak Ikak di umah merdas ngeruce
Madeh pemaken la abis gale
Temuncat mancet macem kerak gile
Kenak kek uman kenak kek inde

Pagi ke peteng merdas ngemencak
Miker kue ari raya lom ade ketak
Dirik madeh nya ngementak
Nek dilawan keriya nya mentinak

Tuan raje, tuan pejabat ikak cem mana
Rakyat yang susah apa juga ikak rasa
Tulong diperati jangen cak-cak dek inga
Jaman tengah pael idup rakyat tambeh sara

Ade rejeki, tulong bagi sikit surang
Rajin sedekeh dek muat harta jadi bekurang
Idup medit akan membuat jadi malang
Keliwat garok pacak-pacak jadi ketulang

Ukan ngenakot ukan nek ngemacak
Maken dek magi pacak-pacak muat balak
Biar tengah pael Amang Ikak dek maksod mintak
Mun ikak berik Amang Ikak dek juga nulak. (*)

kelekaklukok, 03042024

Pos terkait